Archive | May, 2015

Manggagawa Ako

1 May

Manggagawa ako at ngayon ay araw ko

Manggagawa ako na handang tumulong sa inyo

Manggagawa ako na laging nakaantabay at sumasaklolo

Manggagawa ako na may dignidad at mga karapatan tulad ninyo.

 

Magsasaka ako na nagtatanim, nag-aalaga at nag-aani ng mga tanim para sa inyo

Mangingisda ako na lumalaot, sumisisid at nangingisda para sa hapag kainan ninyo

Tindera ako na naglalako ng sari-saring pagkain at mga kagamitan para sa pangangailangan ninyo

Kusinera ako na namamalengke, nagluluto ng masasarap at masustansiyang pagkain ninyo.

 

Gumagawa ako ng banig mula pandan at buli para may mahigaan kayo

Naglalaba at namamalantsa ako ng mga damit para may maisusuot kayo

Nagmamaneho ako ng pampublikong sasakyan para maihatid at makarating agad kayo

Naggugupit ako ng buhok, naglilinis ng mga kuko at nag-aayos ng mukha para maging maganda kayo.

 

Trabahador ako sa pabrika na maghapong nagtratrabaho

Trabahador ako na gumagawa ng mga gusali at mga kalye ninyo

Trabahador ako na labis na nagsusumikap upang mabuhay ako pati pamilya ko

Trabahador ako na humihiling ng umento sa sahod at iba pang benepisyo upang umunlad ang buhay ko.

 

Mabigyan sana ako ng maginhawang buhay

Mabuhay sana ako ng maayos at matiwasay

Masaya at kalidad na buhay ang hangad na taglay

Upang lahat tayo ay mabuhay ng pantay-pantay.